ဘင်္ဂလားဒေ့ရ်ှသို့ကြွမည့် သံဃာ့ဝန်ဆောင်အဖွဲ့ဝင်များကို ဒေသခံသံဃာအဖွဲ့က ကန့်ကွက် ကျော်ထင်/ ၁၉ ဖေဖော်ဝါရီ ၂၀၀၈ (ခေတ်ပြိုင်) | ||
ဘင်္ဂလားဒေ့ရ်ှရဟန်းတော်များသည် ပြီးခဲ့သည့်နှစ် စက်တင်ဘာ (၁၈) ရက်မှစ၍ ပတ္တနိက္ကုဇ္ဇန ကံဆောင်ထားခဲ့ရာ စစ်အစိုးရဖွဲ့စည်းပေးထားသည့် သံဃာ့မဟာနာယကအဖွဲ့မှ ဆရာတော် များကြွရောက်လာမှုသည် သပိတ်မှောက်ကံဆောင်ခြင်းကို ပျက်ပြားစေရန် ရည်ရွယ်သည်ဟု မြန်မာရဟန်းတော်များအဖွဲ့ချုပ် (ဘင်္ဂလားဒေ့ရှ့်) အဖွဲ့၏ ယမန်နေ့ ထုတ်ပြန်ချက်တွင် ဖော်ပြထားသည်။ ရခိုင်ပြည်နယ်တွင် သီတင်းသုံးနေသော အဆိုပါသံဃာတော်များသည် ဘင်္ဂလားဒေ့ရ်ှနိုင်ငံ၊ ဘင်ဒရော်ဘင် (ရွာတော်မြို့) ၌ ဗိုလ်ချုပ်ကြီးခင်ညွန့် ကမကထပြု တည်ထားခဲ့သော စေတီ အနေကဇာတင် ရေစက်ချမည့် အခမ်းအနားသို့ ယနေ့ ကြွလာမည်ဖြစ်ကြောင်း သိရသည်။ မြန်မာရဟန်းတော်များအဖွဲ့ချုပ် (ဘင်္ဂလားဒေ့ရှ်) အဖွဲ့ ပြောခွင့်ရပုဂ္ဂိုလ် အရှင်မေဃိယက မနက်ဖြန်တွင် ပြုလုပ်မည့် အနေကဇာတင်ပွဲသို့ ကြွရောက်ရန် ရွာတော်မြို့မှ ဆရာတော် ဦးစောလှခေါ် ပညာဇောတက စစ်တွေမြို့မှ မဏိရတနာ ဆရာတော်၊ ဒက္ခိဏရာမ ဆရာတော်၊ ဓမ္မသုခ ဆရာတော်၊ ပညာလင်္ကာရ ဆရာတော်၊ မောင်းတောမြို့မှ အောင်ဗလ ဆရာတော်နှင့် ဇောတိကာရုံ ဆရာတော်တို့ကို ဖိတ်ကြားခြင်းဖြစ်ကြောင်း အရှင်မေဃိယက မိန့်ကြားသည်။ သံဃာ့ဝန်ဆောင်အဖွဲ့၏ ရပ်တည်ချက်နှင့်ပတ်သက်၍ အရှင်မေဃိယက “နအဖကို ဆန့်ကျင် တဲ့ ဘုန်းကြီးနဲ့ ထောက်ခံတဲ့ ဘုန်းကြီးတွေဟာ ကွဲပြားမှာတော့ အမှန်ပဲ။ အခုလည်း နအဖမှာ သူတို့ဖွဲ့စည်းထားတဲ့ သံဃာ့ဝန်ဆောင်အဖွဲ့ဆိုတာ အလိုတော်ရိ အဖွဲ့သာဖြစ်တယ်။ အခု စစ်တွေမှာ ဖြစ်ပေါ်ခဲ့တဲ့ သံဃာ့ဆန္ဒပြမှုဆိုတာလည်း သူတို့ကို ဆန့်ကျင်သူနဲ့ ထောက်ခံသူတွေ အကြား ဖြစ်တဲ့ တိုက်ပွဲပဲဖြစ်တယ်” ဟု မိန့်ကြားသည်။ မြန်မာရဟန်းတော်များအဖွဲ့ချုပ် (ဘင်္ဂလားဒေ့ရှ်) သည် သံဃာတော်များ ဦးဆောင်သော စက်တင်ဘာ လူထုလှုပ်ရှားမှု နောက်ပိုင်းတွင် ပြည်ပတွင်ဖွဲ့စည်းခဲ့သည့် သာသနာ့ ဦးသျှောင် အဖွဲ့၏ အဖွဲ့ဝင်ဖြစ်သည်။ ။ | ||
Tuesday, February 19, 2008
ဘင်္ဂလားဒေ့ရ်ှသို့ကြွမည့် သံဃာ့ဝန်ဆောင်အဖွဲ့ဝင်များကို ဒေသခံသံဃာအဖွဲ့က ကန့်ကွက်
Subscribe to:
Post Comments (Atom)
No comments:
Post a Comment